fbpx

सांगोल्यात राष्ट्रवादीला मोठा धक्का, ‘या’ युवा नेत्यानं धरली भाजपची वाट

टीम महाराष्ट्र देशा : विधानसभा निवडणुकीच्या तोंडावर कॉंग्रेस आघाडीच्या अनेक नेत्यांनी भाजपात प्रवेश करण्याचा धडाका लावला आहे. तर आता सोलापूर जिह्यातील आणखी एक राष्ट्रवादी कॉंग्रेसचे युवा नेते भाजपमध्ये प्रवेश करत आहेत. सोलापूरमधील सांगोला येथील राष्ट्रवादी काँग्रेसचे युवा नेते चेतनसिंह उर्फ बाळासाहेब केदार भाजपमध्ये प्रवेश करणार आहेत. चेतनसिंह यांच्या भाजप प्रवेशामुळे राष्ट्रवादी कॉंग्रेसला मोठा धक्का सहन करावा लागणार आहे.

चेतनसिंह हे विद्यमान नगरसेवक आणि युवक राष्ट्रवादी काँग्रेसचे तालुकाध्यक्ष आहेत. माजी उपनगराधक्ष म्हणूनही त्यांनी काम केलं आहे. त्यामुळे स्थानिक राजकारणात चेतनसिंह यांचे चांगले वर्चस्व आहे. तसेच युवकांचा मोठा पाठींबा असल्याने चेतनसिंह यांचा भाजपप्रवेश हा राष्ट्रवादी कॉंग्रेसचे मोठे नुकसान मानले जात आहे. पंढरपूरमध्ये होणाऱ्या भाजप मेळाव्यात भाजप प्रदेशाध्यक्ष चंद्रकांत पाटील यांच्या उपस्थितीत प्रवेश करणार असल्याची माहिती आहे.

दरम्यान काँग्रेस, राष्ट्रवादीचे अनेक आमदार येत्या आठवड्याभरात राजीनामा देणार असल्याचा गौप्यस्फोट भाजपचे महाराष्ट्र प्रदेशाध्यक्ष चंद्रकांत पाटील यांनी केला आहे. त्यांच्या या गौप्यस्फोटानंतर चेतनसिंह यांच्या रुपाने राष्ट्रवादीला हा पहिला धक्का बसणार असल्याचं बोललं जात आहे.