fbpx

युवासेनेची नाराजी दूर करण्यासाठी पूनम महाजन जाणार मातोश्रीवर

टीम महाराष्ट्र देशा : शिवसेनेच्या मनधरणीसाठी भाजपच्या विद्यमान खासदार पूनम महाजन यांना आता मातोश्रीवर जाण्याचा निर्णय घेतला आहे. युवासेनेच्या नाराजीनाट्यानंतर पुनम महाजन मातोश्रीवर जाऊन उद्धव ठाकरेंची भेट घेणार असल्याची माहिती समोर आली आहे.

पूनम महाजन यांच्या प्रचाराच्या बॅनरवर युवासेना प्रमुख आदित्य ठाकरे यांचा फोटो नसल्याने शिवसैनिकांनी नाराजी व्यक्त केलीय. जोपर्यंत पूनम महाजन जाहीर माफी मागत नाहीत तोपर्यंत पूनम महाजनांचा प्रचार करणार नसल्याचा आक्रमक पवित्रा शिवसैनिकांनी घेतलाय.

आदित्य ठाकरे हे देशाचे युथ आयकॉन आहेत. त्यांचा अपमान हा आम्हा शिवसैनिकांचा अपमान आहे. त्यामुळे पूनम महाजन चूक मान्य करेपर्यंत भाजपच्या प्रचारावर बहिष्कार टाकत आहोत अशी टोकाची भूमिका युवसेनेच्या पदाधिकाऱ्यांनी घेतली आहे.