fbpx

पश्चिम बंगालमधील हिंसाचाराला ममता बनर्जीच जबाबदार ; अमित शहांचा पलटवार

टीम महाराष्ट्र देशा : भाजपा अध्यक्ष अमित शाह यांनी तृणमूल कॉंग्रेसच्या अध्यक्षा तसेच पश्चिम बंगालच्या मुख्यमंत्री ममता बनर्जी यांच्यावर कोलकात्यामध्ये रोड शो दरम्यान झालेल्या हिंसाचाराच्या मुद्द्यावरून पलटवार केला आहे. पश्चिम बंगालमधील हिंसेचं कारण तृणमूल काँग्रेस आणि ममता बॅनर्जी आहेत असा आरोप अमित शाह यांनी केला आहे.

लोकसभा निवडणुकीच्या सातव्या आणि शेवटच्या टप्प्यातील मतदान बाकी आहे. याचदरम्यान भाजप अध्यक्ष अमित शाह यांच्या कोलकातामधील रोड शोमध्ये तुफान राडा झाला. इतकेच नव्हे तर, यावेळी जाळपोळ आणि दगडफेकही झाली. त्यानंतर तृणमूल कॉंग्रेसच्या अध्यक्षा तसेच पश्चिम बंगालच्या मुख्यमंत्री ममता बनर्जी यांनी भाजपा अध्यक्ष अमित शाह यांच्यावर निशाणा साधला. त्यानंतर ममता बनर्जी यांच्या टीकेला अमित शाह यांनी पलटवार केला आहे.

संपूर्ण देशात ६ टप्यात मतदान झाले त्यावेळेस कुठेही हिंसाचार झाला नाही. मग केवळ पश्चिम बंगालमध्येच हिंसाचाराची घटना का घडली. पश्चिम बंगालमधील हिंसाचाराला तृणमूल कॉंग्रेस आणि ममता बनर्जी जबाबदार आहेत. दगडफेक करणारे कार्यकर्तेही तृणमूल कॉंग्रेसचेच होते. असे अमित शाह यांनी म्हंटले. इतकेच नव्हे तर, पराभव दिसत असल्याने केवळ मतांच्या राजकारणासाठी तृणमूल कॉंग्रेसच्या कार्यकर्त्यांकडून ईश्वरचंद्र विद्यासागर यांच्या पुतळ्याची तोडफोड करण्यात आली. हिंसा झाली त्यावेळी विद्यासागर कॉलेजचं गेट बंद होतं, मग ईश्वरचंद्र विद्यासागर यांच्या मूर्तीची तोडफोड कुणी केली? कॉलेजच्या आत कोण गेलं? कारण त्यावेळी भाजपचे कार्यकर्ते रस्त्यावर होते. असेही त्यांनी म्हंटले. तसेच ममता बॅनर्जी उघडपणे धमक्या देत आहेत, बदला घेण्याची भाषा करत आहेत. राजकीय नेत्यांना पश्चिम बंगालमध्ये प्रचारसभा घेण्यापासून रोखलं जात आहे. असेही त्यांनी म्हंटले.

याचबरोबर, पश्चिम बंगालमध्ये झालेल्या हिंसाचाराच्यावेळी पोलिसांनी केवळ बघ्याची भूमिका घेतली. असेही अमित शाह यांनी म्हंटले.