‘शरद पवार आंबेडकरी विचाराचे खरे वंशज,त्यांना दलित समाजाचा खरा कळवळा आहे’

sharad pawar

मुंबई : राष्ट्रवादी सामाजिक न्याय विभागाची बैठक आज राष्ट्रवादी काँग्रेस पार्टीच्या मुंबई येथील प्रदेश कार्यालयात राष्ट्रीय अध्यक्ष खा. शरद पवार साहेबांच्या प्रमुख उपस्थितीत पार पडली. यावेळी राष्ट्रवादी सामाजिक न्याय विभागाचे प्रदेशाध्यक्ष जयदेव गायकवाड यांनी शरद पवार यांच्यावर चांगलीच स्तुतिसुमने उधळली आहेत.

आज आंबेडकरी विचाराचे खरे वंशज पवार साहेब आहेत. त्यांना दलित समाजाचा खरा कळवळा आहे. त्यांच्याच विचारांवर पाऊल ठेवून आपल्याला वाटचाल करायची आहे, असे आवाहन गायकवाड यांनी उपस्थितांना केले.

गायकवाड पुढे बोलताना म्हणाले,लोकशाहीची लढाई झाली आणि त्यात आपण परिवर्तन करून दाखवले. याबद्दल आदरणीय पवार साहेबांचे अभिनंदन करतो की त्यांनी राज्यात फुले-शाहू-आंबेडकरांच्या विचारांचे सरकार स्थापन करण्याचे काम केले. राज्यात एक सामाजिक संतुलन निर्माण करण्याकरता आपण ठोस पावले उचलत आहोत याचे समाधान वाटते.

खा. पवार साहेबांनी विकास यादीत पाचव्या क्रमांकावर असलेले इंदू मिलमधील डॉ. बाबासाहेब आंबेडकरांच्या आंतरराष्ट्रीय स्मारकाचे नाव पहिल्या क्रमांकावर आणण्याचे काम केले आहे. यातून सर्व दलित समाजाला आनंद देण्याचे काम त्यांनी केले आहे. आज आपण गावांच्या रचनेत फेरबदल करण्याची गरज आहे. गावागावात असलेल्या अदृश्य भिंती तोडण्याचे काम आपण करण्याची गरज आहे. जातीवाचक नावे घेणे बंद करण्याची गरज आहे असं ते म्हणाले.

यावेळी पवार यांनीही उपस्थितांना मार्गदर्शन केले. या बैठकीला उपमुख्यमंत्री अजित पवार, मा. जलसंपदा मंत्री जयंत पाटील, सामाजिक न्याय मंत्री धनंजय मुंडे, मा. अल्पसंख्याक मंत्री नवाब मलिक उपस्थित होते.केंद्र_सरकारचे आज समाजातील पिछडलेल्या वर्गाकडे लक्ष नाही. या वर्गासाठी परिवर्तन करण्याचे काम आपण केले पाहिजे. ज्यांच्या हाती देशाची सत्ता आहे ते ठराविक समाजाचा विचार करून निर्णय घेण्याचे काम करत आहेत. बहुसंख्य लोकांना याची जाणीव नाही, असे मत खा. शरद पवार यांनी व्यक्त केले.