यूट्यूब चॅनलवाल्यांनी मला संपवण्याचा प्रयत्न केला, परंतु सांगतो चॅनल संपतील पण मी नाही – इंदुरीकर महाराज

indurikar maharaj

शिर्डी : ‘यूट्यूबवाले आणि कॅमेरावाले माझ्या मागे लागलेत. यू ट्यूबवाले काड्या करतात. यूट्यूब चॅनलवाल्यांनी मला संपवण्याचा प्रयत्न केला. परंतु सांगतो चॅनल संपतील पण मी नाही”, असं स्पष्टीकरण या सर्व विधानाबाबत इंदुरीकर महाराज यांनी दिले. ‘यूट्यूबवाल्यांना इंदुरीकराच्या नावाने मोक्कार पैसा मिळाला,’ असे ते म्हणाले.

ते शिर्डी येथे माध्यमांशी याबाबत बोलत होते. यावेळी बोलताना ते म्हणाले की, ‘यूट्यूबवाल्यांना इंदुरीकराच्या नावाने पैसा मिळाला मोक्कार. मी काय या यूट्यूबचा एक रुपयाही घेतला नाही. ही यूट्यूबवाली मंडळी झाली कोट्याधीश. एक एक लाख लाईक आहेत. पैसाच मोजता येईना, इतका पैसा झालाय. पाहाणाऱ्यांची संख्या खूप आहे,’ असे ते म्हणाले.

तसेच ‘समतिथीला मुलगा आणि विषमतिथीला मुलगी ही भागवतातही खरंय, ज्ञानेश्वरीतही खरंय. मी म्हणतोय हे खरंय. तरी लोकं म्हणतायेत याला ठेऊन द्या पहिलं. आणि चारी बाजूला… तीन दिवसात अर्धा किलोने कमी झालो हो..आपली आता कपॅसिटी संपली. उद्या-परवाचा दिवस बघायचं, ठेऊन द्यायचा फेटा, आता शेतीच करायची. बस्स.. आता नको मजा नाही राहिली,’ असे इंदुरीकर महाराज म्हणाले.

दरम्यान, ‘दोन तासांच्या किर्तनात एखादं वाक्य चुकीचं जाऊ शकतं. मात्र मी जे बोललो, ते चुकीचं नाहीच. मी बोललेलं अनेक ग्रंथात नमूद आहे. वादामुळे मला खूप त्रास होत आहे. एक दोन दिवस बघेन आणि किर्तन सोडून शेती करेन,’ असे इंदुरीकर महाराज म्हणाले.