fbpx

इम्तियाज जलील यांची खासदारकी धोक्यात ?

टीम महाराष्ट्र देशा : एमआयएमचे औरंगाबादचे खासदार इम्तियाज जलील अडचणीत येण्याची शक्यता आहे. इम्तियाज जलील यांच्या निवडीला आव्हान देणारी याचिका मुंबई उच्च न्यायालयाच्या औरंगाबाद खंडपीठात दाखल झाली आहे. धर्माच्या नावावर मतं मागितल्यामुळे इम्तियाज जलील यांचं सदस्यत्व रद्द करण्याची आणि त्यांना निवडणुकीतून अपात्र ठरवण्याची मागणी करण्यात आली आहे.

प्रतिज्ञापत्रात दाखल गुन्ह्याची कलमे लपवणे आणि खर्चाचा हिशोब न मांडणे या कारणावरून याचिका दाखल करण्यात आल्याचं समजतंय. दरम्यान, इम्तियाज जलील यांच्यावरील आरोप सिद्ध झाल्यास त्यांचं सदस्यत्व रद्द होऊ शकतं.
लोकसभा निवडणूकीतील बहुजन महापार्टी या पक्षातर्फे निवडणूक लढविलेले उमेदवार शेख नदीम शेख करीम यांनी ऍड. सिद्धेश्‍वर ठोंबरे यांच्यातर्फे ही याचिका सादर केली आहे. याचिकेमध्ये इम्तियाज जलील यांची निवडणूक रद्द करण्याची विनंती करण्यात आली आहे. याचिकेत निवडणूक आयोग, खासदार इम्तियाज जलील यांच्यासह निवडणुकीतील सर्वच उमेदवारांना प्रतिवादी करण्यात आले आहे.