भुजबळांचे काही बरवाईट झाल्यास मुख्यमंत्री तुम्हीच जबाबदार- शरद पवार

शरद पवारांचा मुख्यमंत्र्यांना खोचक सवाल

मुंबई: छगन भुजबळांचे काही बरवाईट झाल्यास मुख्यमंत्री देवेंद्र फडणवीस तुम्हीच जबादार असाल म्हणत  राष्ट्रवादी काँग्रेसचे अध्यक्ष शरद पवार यांनी देवेंद्र फडणवीस यांना पत्र लिहिले आहे. यामध्ये भुजबळ यांच्या प्रकृती विषयी चिंता व्यक्त करत त्यांना योग्य उपचार देण्याची मागणी पवार यांनी केली आहे.

 

राष्ट्रवादी काँग्रेस नेते छगन भुजबळ दोन वर्षांपासून आर्थिक गैरव्यवहारप्रकरणी कोठडीत आहेत. भुजबळ यांच्या शारीरिक स्वास्थावरही परिणाम झाला आहे. वयाच्या ७१ व्या वर्षी तुरुंगात राहण्याची वेळ आलेल्या छगन भुजबळ यांना योग्य वैद्यकीय उपचार मिळावेत, अशी मागणी पवार यांनी मुख्यमंत्र्यांना पत्राद्वारे केली आहे. भुजबळांना योग्य वैद्यकीय उपचार न मिळाल्याने प्रकृतीला धोका निर्माण झाला तर याची संपूर्ण जबाबदारी ही सरकारची असेल, असा इशाराही शरद पवारांनी पत्रात दिला आहे.

 

sharad pawar

काय म्हणाले शरद पवार? 

काही दिवसांपासून छगन भुजबळ यांच्या ढासळत जाणाऱ्या प्रकृतीविषयी मला अतिशय चिंता वाटत आहे. त्यांचं वय ७१ वर्ष असून ते १४ मार्च २०१६ पासून (२ वर्ष) तुरुंगात आहे. त्यांची प्रकृती अतिशय कमकुवत झाली आहे.

हे कायदेशीर प्रकरण आहे. माननीय कोर्टाने छगन भुजबळ यांच्याविषयी अद्याप कोणताही निर्णय घेतलेला नाही. जोपर्यंत न्यायालय अंतिम निर्णय देत नाही, तोपर्यंत भुजबळांना निर्दोष मानलं जाईल. जामीन हा नियम आहे, तुरुंग हा अपवाद आहे. हाच नियम छगन भुजबळ यांनाही लागू होतो. पण दुर्दैवाने भुजबळांना वारंवार जामीन नाकारण्यात आला आहे. तरीही मला या विषयावर भाष्य करायचं नाही.

छगन भुजबळ हे ओेबीसी नेते असून ५० वर्ष त्यांनी सार्वजनिक जीवनासाठी खर्च केली आहेत. मुंबईचे महापौर, महाराष्ट्राचे उपमुख्यमंत्री, गृहमंत्री, सार्वजनिक बांधकाम, पर्यटन मंत्री अशा जबाबदाऱ्या त्यांनी पार पाडल्या आहेत. शिवाय महाराष्ट्राच्या जनतेच्या कल्याणासाठी त्यांचं योगदान विसरता येणार नाही.

माझी फार अपेक्षा नाही. पण छगन भुजबळांना योग्य वैद्यकीय उपचार मिळायला हवेत. तो त्यांचा घटनात्मक अधिकारही आहे. छगन भुजबळ यांची प्रकृती आणि वाढतं वय पाहता, आवश्यक ती पावलं उचलून त्यांना योग्य वैद्यकीय सेवा पुरवल्या जातील, याची मला खात्री आहे.

मला हे लिहिताना दु:ख होतं आहे, पण तरीही जर येत्या काही दिवसात योग्य उपचारांअभावी छगन भुजबळांची प्रकृती खालावली, तर त्यासाठी तुमचं सरकार जबाबदार असेल.