बुलेटचा कर्णकर्कश फट-फट आवाज आला तर खबरदार ! होणार ही कारवाई

पुणे : बुलेट गाड्यांमधून फटाक्यांसारखा आवाज काढणाऱ्या वाहनचालकांच्या विरोधात प्रादेशिक परिवहन कार्यालय व वाहतूक पोलिसांनी संयुक्तपणे मोहीम सुरू केली असून, पहिल्याच दिवशी ११ वाहनचालकांना धडा शिकविण्यात आला आहे. या ११ बुलेटवर जप्तीची कारवाई करून, २१ हजार रुपये दंड आकारल्यानंतरच गाड्या वाहनधारकांना सुपूर्द करण्यात आल्या.
हडपसर पोलिस स्टेशनच्या हद्दीत मांजरी येथील गोपाळपट्टीत पोलिसांकडून नाकाबंदी करण्यात आली होती. यावेळी बुलेट गाड्यांना कर्णककर्ष हॉर्न बसविण्यात आल्याचे तसेच, फायरिंगचा आवाज मोठा काढण्यासाठी सायलेन्सरमध्ये बदल केल्याचे आढळून आले. या प्रकारामुळे ध्वनिप्रदूषण होत असल्याचे नमूद करून वाहतूक पोलिसांनी गाड्या आरटीओच्या ताब्यात दिल्या. आरटीओने या गाड्या जप्त केल्या. ध्वनिप्रदूषण केल्याच्या दंडात्मक कारवाईबरोबरच वाहनाचा विमा नसल्याचाही दंड आकारण्यात आला. त्यामुळे या वाहनधारकांना जास्त दंड द्यावा लागला.

क्रेझ वाढल्याने रस्त्यावर बुलेटची संख्या वाढली आहे. या वाढलेल्या बुलेटमुळे ध्वनिप्रदूषणात भर पडत असल्याचे चित्र आहे. बुलेटला प्रेशर हॉर्न बसविण्याचे प्रमाण अधिक आहे. तसेच, जास्त आवाज काढणारे सायलेन्सर बसविले जातात. या वाहनांवर यापुढेही आरटीओ आणि वाहतूक पोलिसांकडून कारवाई केली जाणार आहे, अशी माहिती उपप्रादेशिक परिवहन अधिकारी संजय राऊत यांनी दिली.

समुपदेशनाचा ‘तास’

बुलेटच्या सायलेन्सरमध्ये बदल करून फटाक्याचा आवाज काढणाऱ्या त्या ‘बुलेट राजां’ना आरटीओच्याअधिकाऱ्यांनी जवळपास तासभर समुपदेशन केले. हॉर्न किंवा सायलेन्सरमधून काढण्यात येणाऱ्या फटाक्याच्या आवाजामुळे होणारे दुष्परिणाम त्यांना समजून सांगण्यात आले.

दंडाचा प्रस्ताव सादर

राज्याच्या परिवहन विभागाचे प्रधान सचिव मनोज सैनी यांनी वाहनांच्या कर्णकर्कश्य हॉर्नमुळे होणारे ध्वनिप्रदूषण रोखण्यासाठी, विनाकारण हॉर्न वाजविणाऱ्यांवर पाचशे रुपयांपर्यंत दंडात्मक कारवाई करण्याचा प्रस्ताव राज्याच्या विधी व न्याय विभागाला सादर केला आहे. तसेच, पुण्यातील उपप्रादेशिक परिवहन अधिकारी संजय राऊत गेल्या चार वर्षांपासून ‘नो-हॉर्न’ मोहीम राबवित आहेत. त्यांच्या या मोहिमेच्या पार्श्वभूमीवर राज्यभरातील आरटीओंना मोहीम राबविण्याच्या सूचना सैनी यांनी दिल्या आहेत.

You might also like
Comments
Loading...