कॅबिनेटच्या पहिल्याच बैठकीत बिहारी तरुणांना १० लाख नोकऱ्या देईन

tejashvi yadav

पाटणा : बिहार विधानसभा निवडणुकीच्या तारखा जाहीर झाल्या आहेत. निवडणुकीचा निकाल १० नोव्हेंबरला लागणार आहे. निवडणुकीच्या तयारीसह या राजकीय पक्ष आपल्या विजयाचा दावा करत आहेत.

एकीकडे भाजपक्ष आणि जनता दल युनायटेड ( JDU ) आघाडीने पुन्हा सत्तेत येण्याचा विश्वास व्यक्त केला आहे. तर दुसरीकडे राष्ट्रीय जनता दलाचे ( RJD ) नेते तेजस्वी यादव यांनी बिहारमध्ये सत्तांतर घडवण्याचा दावा केला आहे. निवडणुकीपूर्वी तेजस्वी यादव यांनी मोठं आश्वासन दिलं आहे. आपले सरकार बनले तर मंत्रिमंडळाच्या पहिल्याच बैठकीत बिहारमधील १० लाख तरुणांना नोकर्‍या मिळतील, असं तेजस्वी यादव म्हणालेत.

बिहारमध्ये आधीच ४ लाख ५० हजार जागा रिक्त आहेत. शिक्षण, आरोग्य, गृह विभाग आणि इतर विभागातील राष्ट्रीय सरासरीनुसार बिहारमध्ये ५ लाख ५० हजार नियुक्त्यांची अत्यंत गरज आहे, असं तेजस्वी यादव म्हणाले. त्यांनी यासंदर्भात ट्विट केलंय. सत्तेत आल्यावर मंत्रिमंडळाच्या पहिल्या बैठकीत बिहारमधील १० लाख तरुणांना नोकर्‍या देईन, असं आश्वासन यादव यांनी दिलं.

तेजस्वी यादव हे आधीपासून रोजगाराच्या मुद्यावरून नितीश सरकारला घेरत आले आहेत. तरुणांना नोकरी देण्याच्या नावाखाली केंद्र सरकारने फसवणूक केल्याचा आरोपही त्यांनी केला. उद्योग प्रोत्साहन आणि अंतर्गत व्यापाराच्या मुद्द्यावर बिहार देशात २६ व्या क्रमांकावर आहे. बिहारमधील गुंतवणूक आणि उद्योग उभारण्यात राज्य सर्वात खालच्या क्रमांकावर आहे. उदारीकरणानंतर १५ वर्षे सत्तेत असलेले मुख्यमंत्री नितीशकुमार आणि एनडीए सरकार या आकड्यांवर गप्प का आहे?, असा सवाल तेजस्वी यादव यांनी केला आहे.

शेतकर्‍यांच्या प्रश्नावर तेजस्वी यादव यांनीही एनडीए सरकारला घेरलं आहे. कृषी विधेयकाविरोधात पाटण्यात ट्रॅक्टर रॅली काढली आणि त्यामध्ये तेजस्वी यादव ट्रॅक्टर चालवताना दिसून आले. या विरोध आंदोलनात आरजेडीचे हजारो कार्यकर्ते सहभागी झाले होते. कृषी विधेयकांवरून तेजस्वी यादव यांनी केंद्र सरकारव टीका केली. एनडीए सरकारने अन्नदाता शेतकऱ्याला देणगीदारांच्या हातचे बाहुले बनवले आहे. शेतकरी विधेयक मंजूर होताच ज्या गोंधळात कृषी विधेयकं मंजूर झाली ते पाहता यात काहीतरी गडबड नक्कीच आहे. या सरकारला शेतकऱ्यांची शान आणि त्यांच्या जीवाची पर्वा नाही, असा आरोप तेजस्वी यादव यांनी काही दिवसांपूर्वी केला होता.

महत्वाच्या बातम्या :-