उद्यापासून औरंगाबादेत लस’सक्ती’; नागरिकांची तारांबळ

उद्यापासून औरंगाबादेत लस’सक्ती’; नागरिकांची तारांबळ

vaccination

औरंगाबाद : ऑटो रिक्षा, ट्रॅव्हल्स एजन्सी, सर्व आस्थापना, हॉटेल्स, खानावळी, मद्य विक्री करणाऱ्या चालक, मालक, कर्मचारी, कामगारांनी कोरोना प्रतिबंधात्मक लस घेणे आवश्यक आहे. २५ नोव्हेंबरनंतर कडक कारवाई करण्याचा इशारा दिला आहे. सर्वांनी लस घ्यावी, अन्यथा आदेशाचे उल्लंघन करणाऱ्यांवर आपत्ती व्यवस्थापन कायदा २००५ मधील तरतुदीनुसार यथायोग्य कारवाई करण्यात येईल, असे जिल्हाधिकारी सुनील चव्हाण (Sunil chavan) यांनी नुकत्याच काढलेल्या आदेशात म्हटले आहे.

या आदेशाची अंमलबजावणी २५ नोव्हेंबरपासून सुरु होणार आहे. दिवसभरात अनेक वेगवेगळे प्रवासी ऑटोरिक्षाने प्रवास करतात, यामुळे कोविड-१९ संसर्गाचा धोका अधिक आहे. कोरोनाचा प्रादुर्भाव टाळण्यासाठी ऑटो रिक्षा चालकांचे लसीकरण होणे अत्यंत आवश्यक आहे. जिल्ह्यातील सर्व ऑटोरिक्षा तसेच प्रवासी वाहतूक करणाऱ्या वाहनचालकांनी कोविड-१९ प्रतिबंधात्मक लसीचा किमान पहिला डोस घेतलेला असणे आवश्यक आहे. अन्यथा अशा वाहनांवर दंडात्मक कार्यवाही करण्यात येईल. तसेच सदर वाहन जप्त करण्यात येईल.

ट्रॅव्हल्स एजन्सी यांनी ट्रॅव्हल्सद्वारे प्रवास करणाऱ्या प्रवाशांचे लसीकरण झाले असल्याबाबतची काऊंटरवरच खात्री करावी. लसीकरण झालेल्या प्रवाशांनाच तिकीट देण्यात यावे. लसीकरण न झालेल्या प्रवाशांना तिकीट देण्यात येऊ नये. तसेच ट्रॅव्हल्स एजन्सीचे चालक, मालक, कर्मचाऱ्यांचे सुद्धा लसीकरण झालेले असणे आवश्यक राहील, या अनुषंगाने प्रादेशिक परिवहन अधिकारी यांनी कार्यवाही पार पाडावी. जिल्ह्यातील सर्व प्रकारच्या आस्थापनेतील चालक, मालक व कामगार यांचे लसीकरण झालेले अनिवार्य असेल. कोणत्याही प्रकारच्या आस्थापनांमध्ये लसीकरण न झालेले कर्मचारी आढळून आल्यास, सदर आस्थापना दंडात्मक कार्यवाहीसह सील करण्याची कार्यवाही करण्यात येईल.

महत्त्वाच्या बातम्या