fbpx

#होरपळतोय महाराष्ट्र : वर्ध्यात कारागृहातील कैदी पाणीटंचाईने त्रस्त

टीम महाराष्ट्र देशा : राज्यभरात सध्या भीषण दुष्काळ पडल्याचे चित्र आहे. नागरिक भीषण पाणीटंचाईला तोंड देत आहेत, असे असले तरीही पाणीटंचाईवर कायमस्वरुपी उपाययोजना करण्यासाठी प्रशासन, सामाजिक संस्था अथवा लोकप्रतिनिधींकडून सध्यातरी कोणतेही पाऊल उचलले जात नसल्याचे समोर येत आहे.

वर्धा जिल्ह्यात यंदा दुष्काळाने डोके वर काढले आहे. जिल्ह्यतील नागरिकांना भीषण पाणीटंचाईचा सामना करावा लागत आहे. अशातच जिल्हा कारागृहातील कैदीदेखील पाणीटंचाईने त्रस्त आहेत. वर्धा कारागृहात १५० वर्षांमध्ये पहिल्यांदाच पाणीटंचाईच्या झळा कैद्यांनाही सोसाव्या लागत आहे. या कारागृहात जवळपास ३५० कैदी आहेत. कारागृहात एकूण ६ विहिरी आहेत. त्यापैकी ३ विहिरी कैद्यांना पाणी पुरवठ्यासाठी आहेत. पण, या विहिरीत पाणी नसल्याने कारागृहात पाणीटंचाई निर्माण झाली आहे.

दरम्यान, पालिकेकडून टँकरने पाणी पुरवठा करण्यात येत आहे. मात्र, तो गरजेपेक्षा कमी आहे. पाण्याअभावी बाथरुमची सफाई करणेही शक्य होत नाही. पाण्याच्या या टंचाईने कैद्यांमध्ये असंतोष निर्माण झाला आहे.