डॉ.बाबासाहेब आंबेडकर मराठवाडा विद्यापीठाच्या कुलगुरूंच्या चौकशीचे आदेश

औरंगाबाद: उच्च शिक्षणमंत्री विनोद तावडे यांनी डॉ. बाबासाहेब आंबेडकर मराठवाडा विद्यापीठाचे कुलगुरू डॉ. बी. ए. चोपडे यांच्या कामकाजासंदर्भात चौकशी करण्यासाठी माजी कुलगुरू डॉ. एस. एफ. पाटील यांची चौकशी समिती नेमण्याची घोषणा विधानपरिषदेत केली. ही समिती दोन महिन्यात वस्तुस्थितीदर्शक अहवाल राज्यपालांना सादर करणार आहे. घोषणेनंतर लगेचच याविषयीचा शासन निर्णयही काढण्यात आला असून या शासन निर्णयात विविध समितीच्या कामकाजाविषयी स्पष्टीकरण देण्यात आले.

का दिले चौकशीचे आदेश ?

विद्यापीठात शासकीय कामकाज विद्यापीठ कायद्यानुसार होत नसल्याच्या अनेक तक्रारी राज्यपाल तथा कुलपती यांच्याकडे विविध संघटना, संस्था आणि व्यक्तींनी केल्या होत्या. याचवेळी विधानपरिषदेचे विरोधी पक्षनेते धनंजय मुंडे, आमदार सतीश चव्हाण यांच्या शिष्टमंडळानेही राज्यपाल सी. विद्यासागर राव यांची भेट घेत कुलगुरूंनी केलेल्या अनियमिततेविषीयी निवेदन दिले होते. यानंतर आमदार चव्हाण यांनी विधानपरिषदेत नियम २६० अन्वये झालेल्या चर्चेत विद्यापीठाचा कारभार आणि कुलगुरूंच्या आर्थिक भ्रष्टाचारांची मुद्देसुद मांडणी केली होती.