जिल्हा प्रशासनानेही भगवान गडावरील दसरा मेळाव्यास परवानगी नाकारली

अहमदनगर : भगवान गडावर दसरा मेळावा घेण्यासाठी पंकजा मुंडे यांनी महंत नामदेव शास्त्री यांना भावनिक पत्र लिहून आवाहन केले होते. त्याचबरोबर जिल्हा प्रसासानाकडे देखील याबाबतची परवानगी मागितली होती. परंतु, पोलिसांचा गोपनीय अहवाल आणि अर्जदाराकडे विश्वस्तांचं ना हरकत प्रमाणपत्र नसल्याने परवानगी नाकारली आहे. कायदा आणि सुव्यवस्थेच्या पार्श्वभूमीवर प्रशासनाने दसरा मेळाव्यासाठी परवानगी दिली नाही.

यात विशेष बाब म्हणजे पंकजा मुंडे समर्थकांनी पालक मंत्री राम शिंदे यांना साकड घालत गडावर मेळाव्यास परवानगी मिळावी म्हणून विनवणी केली होती, पण यावर मुख्यमंत्री निर्णय घेतील अस सांगत पालकमंत्री राम शिंदे यांनी आपले हात वर केले आहेत. स्व.गोपीनाथ मुंडे यांचे खंदे समर्थक असलेले राम शिंदे यांनी पंकजा मुंडे यांच्या बाबतीत मात्र हात वर केल्याने चर्चेला उधान आले आहे.

दरम्यान, मुख्यमंत्री परदेश दौऱ्यावर असल्याने या सगळ्या घडामोडींना नवं वळण लागण्याची शक्यता आहे. आधीच जनतेच्या मनातील मुख्यमंत्र्यांची आस काही लपून नाहीये. त्यामुळे पंकजा समर्थक याला मुख्यमंत्री देवेंद्र फडणवीस यांचा धक्का समजून आपली भावना व्यक्त करतील अशी चर्चा रंगत आहे.