fbpx

सोलापुरात मोहिते पाटील लागले कामाला, जिल्हा परिषदेत संजयमामा विरोधात अविश्वास ठराव ?

vijaysinh mohite & sanjay shinde

टीम महाराष्ट्र देशा : लोकसभा निवडणुकीच्या मुहूर्तावर भाजपमध्ये प्रवेश केलेले रणजितसिंह मोहिते पाटील यांनी सोलापूर जिल्ह्यामध्ये राजकीय वजन वाढवण्यास सुरुवात केली आहे. जिल्हा परिषदेचे अध्यक्ष संजय शिंदे यांच्या विरोधात अविश्वास ठराव आणत त्यांची कोंडी करण्याची खेळी केली जात आहे. पालकमंत्री विजयकुमार देशमुख आणि रणजितसिंह मोहिते पाटील यांनी यासाठी पुढाकार घेतल्याची माहिती सूत्रांनी दिली आहे.

जिल्हा परिषद निवडणुकीत संख्याबळ असताना संजय शिंदे यांच्या बंडामुळे मोहिते पाटलांना सत्तेतून बाहेर रहाव लागलं होत, आता लोकसभा निवडणुकीत झालेल्या उलथापालथीमुळे सोलापूर जिह्यातील राजकारण ढवळून निघाले आहे, भाजपची साथ घेत जि प अध्यक्ष झालेले संजय शिंदे राष्ट्रवादीमध्ये तर रणजितसिंह मोहिते पाटील भाजपमध्ये दाखल झाले आहेत. शिंदे यांनी निवडणुकीच्या तोंडावर भाजपची साथ सोडल्याने दुखावले गेलेल्या मुख्यमंत्री देवेंद्र फडणवीस आणि महसूलमंत्री चंद्रकांत पाटील यांनी त्यांचा पराभव करण्यासाठी जोरदार प्रयत्न केले आहेत.

दरम्यान, लोकसभेचा निकाल लागण्यापूर्वीच शिंदे यांना अध्यक्षपदावरून पायउतार करण्यासाठी राजकीय हालचाली सुरु झाल्या आहेत. आज पालकमंत्री विजयकुमार देशमुख यांच्या प्रमुख उपस्थितीत समविचारी नेत्यांची बैठक घेण्यात आली आहे, या बैठकीला माजी खासदार रणजितसिंह मोहिते पाटील यांच्यासह जिल्ह्यातील प्रमुख नेते उपस्थित होते. या बैठकीत संजय शिंदे यांच्या विरोधात अविश्वास ठराव मांडण्याची चर्चा झाल्याचं कळतय.

सोलापूर जिल्हा परिषद पक्षीय बलाबल

  • राष्ट्रवादी – २३
  • काँग्रेस – ७
  • दीपक साळुंखे व गणपतराव देशमुख – ५
  • भाजप – १४
  • शिवसेना – ५
  • परिचारक गट – ३
  • शहाजीबापू पाटील गट – २
  • महाडिक गट – ३
  • समाधान आवताडे गट – ३
  • संजय शिंदे गट – २
  • सिद्रामप्पा पाटील गट- १