‘आघाडी करताना जिंकणे शक्य असलेल्या जागा राष्ट्रवादी स्वत:कडे ठेवते’, कॉंग्रेसचा गंभीर आरोप

congress ncp

अहमदनगर : महाराष्ट्रातील आगामी सर्व महापालिका आणि स्थानिक स्वराज्य संस्थांच्या निवडणुका स्वबळावरच लढण्याची घोषणा काँग्रेस प्रदेशाध्यक्ष नाना पटोले यांनी केली आहे. नाना पटोले यांनी दिल्लीत जाऊन राहुल गांधी यांची भेट घेतली. स्वबळावर निवडणूक लढण्यासाठी काँग्रेस नेते राहुल गांधी यांनी सहमती दिल्याची माहिती पटोले यांनी दिलीय.

त्यानंतर आता राज्यात महाविकास आघाडीत स्थानिक स्थरावर अनेक ठिकाणी खटके उडत असल्याचे चित्र समोर येत आहे. नाना पटोले यांच्या स्वबळाच्या घोषणेचे अहमदनगर शहर काँग्रेसतर्फे स्वागत करण्यात आले आहे. ‘आघाडी करताना जिंकणे शक्य असलेल्या जागा राष्ट्रवादी काँग्रेस स्वत:कडे ठेवत असल्याने आतापर्यंत काँग्रेसचे नुकसानच होत आले आहे,’ असा आरोप काँग्रेसचे शहर जिल्हाध्यक्ष किरण काळे यांनी केला आहे. तसेच महापालिकेत आतापासूनच काँग्रेस विरोधकाची भूमिका बजावणार असून आगामी निवडणूक स्वतंत्र लढणार असल्याचेही त्यांनी सांगितले आहे.

नगरमध्ये गेल्या काही काळापासूनच काँग्रेसने उघडपणे विरोधाची भूमिका घेतली आहे. मधल्या काळात महापालिकेत महाविकास आघाडीची सत्ता स्थापन झाल्याचे सांगण्यात येत असले तरी काँग्रेसने मात्र आपण त्यामध्ये सहभागी नसल्याचे म्हटले आहे.

दरम्यान, यापूर्वीच्या निवडणुकांमध्ये काँग्रेस-राष्ट्रवादीची आघाडी राहिलेली आहे. ज्या प्रभागांमध्ये काँग्रेसचा मतदार आहे त्याच प्रभागांमध्ये राष्ट्रवादीचा देखील मतदार आहे. काँग्रेस-राष्ट्रवादी आघाडीचा राष्ट्रवादीला कायमच फायदा झाला आहे. मात्र यातून काँग्रेस कार्यकर्त्यांवर अन्याय झाल्याची भावना कार्यकर्त्यांमध्ये आहे. दर वेळच्या जागा वाटपामध्ये काँग्रेस-राष्ट्रवादी आघाडी म्हणून निवडून येऊ शकणाऱ्या जवळपास सर्वच जागा या राष्ट्रवादी आपल्या पदरात पाडून घेते आणि इतर पक्षांचे प्राबल्य असणाऱ्या प्रभागांमध्ये काँग्रेससाठी जागा सोडल्या जातात. यामुळे काँग्रेसच्या ताकदीचा उपयोग राष्ट्रवादीला झाला. असे किरण काळे यांनी म्हंटले आहे.

मात्र, राष्ट्रवादीचा काँग्रेसला कोणताही फायदा झाला नाही. उलटपक्षी काँग्रेसचे खच्चीकरण झाले, असे कार्यकर्त्यांचे म्हणणे आहे. यामुळेच आमची मनपातील संख्या ही कमी राहिली. सध्याची शहरातील राजकीय परिस्थिती पाहता सर्वच पक्ष एकत्र आल्याचे चित्र जनतेला पाहायला मिळत आहे. मात्र काँग्रेस या सर्वपक्षीय सहमती एक्सप्रेसचा भाग नाही. अनेक चांगले आणि वजनदार चेहरे काँग्रेस पक्षात येण्याच्या वाटेवर आहेत. निवडणुका अद्याप दूर असल्या तरीही त्या डोळ्यासमोर ठेवूनच आम्ही संघटनात्मक बांधणीसाठी आतापासूनच कंबर कसून कामाला लागलो आहोत. शहरातील काँग्रेस कार्यकर्त्यांची स्वबळाची भावना थोरात यांच्यासमोर योग्य वेळी मांडली जाईल. शेवटी अंतिम निर्णय हा त्यांचाच असेल. असेही काळे यांनी स्पष्ट केले आहे.

महत्वाच्या बातम्या 

IMP