गुजरातची सत्ता भाजप गमावणार?;भाजपच्या खासदाराचा घरचा आहेर 

मित्र पक्षांची मदत घेतली तरी गुजरातमध्ये भाजपला सत्ता मिळणार नाही- काकडे

पुणे- गुजरातमध्ये भाजपला मोठा फटका बसणार असून मित्र पक्षांची मदत घेतली तरी तिथे सत्ता मिळणार नाही असं भाकीत भाजपचे सहयोगी खासदार संजय काकडे यांनी वर्तवलं आहे.  काकडे यांच्या भाकीतामुळे सर्वांच्याच भुवया उंचावल्या आहेत. पुणे महानगरपालिकेच्या निवडणुकीपूर्वी काकडे यांनी एक सर्वेक्षण केलं होतं, या सर्वेक्षणात भाजपला ९२ जागा मिळतील असा त्यांनी अंदाज वर्तवला होता आणि भाजपला पुण्यात ९८ जागा मिळाल्या होत्या. तशाच पद्धतीने काकडे यांनी गुजरातमध्ये देखील सर्वेक्षण केलं असून यामध्ये भाजपला सत्तेपर्यंत पोहोचता येणार नाही असा अंदाज वर्तवण्यात आला आहे.

पुणे मिरर या इंग्रजी दैनिकाने यासंदर्भातील वृत्त प्रकाशित केलं आहे. या वृत्तपत्राशी बोलताना काकडे म्हणाले की “गेली अनेक वर्ष भाजप गुजरातमध्ये सत्तेत आहे. पण यंदाची स्थिती ही भाजपसाठी चिंताजनक बनली आहे. दीर्घकाळ सत्तेत असल्याने यंदा आम्हाला(भाजपला) नाराजीचा फटका बसण्याची दाट शक्यता आहे. गुजरातमधील मुसलमान हे भाजपवर नाराज असून नरेंद्र मोदी मुख्यमंत्री असताना त्यांचं जसं गुजरातवर लक्ष होतं तसं त्यांना पंतप्रधान झाल्यापासून त्यांना इथे लक्ष देता येणं शक्य होत नाहीये. गुजरातमध्ये नरेंद्र मोदी यांच्या तोडीचा एकही उमेदवार भाजपला गेल्या ३ वर्षात सापडलेला नाहीये. विकासाचा मुद्दा हा भाजपच्या प्रचारातील मुख्य मुद्दा बनू शकला नाही. या सगळ्या गोष्टी पाहता मी गुजरातमध्ये पाठवलेल्या माणसांनी केलेल्या सर्वेक्षणात गुजरातमध्ये भाजपने गेल्या निवडणुकीत जो विजय मिळवला होता तशी कामगिरी करता येणं त्यांना शक्य होणार नाही असं दिसतंय”