fbpx

नाना पाटेकरांना मोठा दिलासा, तनुश्री दत्ताने सादर केलेले पुरावे कमकुवत

टीम महाराष्ट्र देशा : लैंगिक शोषणाचे आरोप असलेले ज्येष्ठ अभिनेते नाना पाटेकर यांना कोर्टाकडून दिलासा मिळाला आहे. अभिनेत्री तनुश्री दत्ताने नाना पाटेकर यांच्या विरोधात # me too अंतर्गत लैंगिक शोषणाचा आरोप करत ओशिवरा पोलीस ठाण्यात गुन्हा दाखल केला होता. त्यावर आता ओशिवरा पोलिसांनी कोर्टात बी समरी अहवाल सादर केला आहे. मात्र या अहवालानुसार नाना पाटेकर यांच्याविरोधात असणारे पुरावे हे कमकुवत असल्याचे कोर्टाने नमूद केले आहे. त्यामुळे नाना पाटेकर यांच्यासाठी हे दिलासा देणारे वृत्त आहे.

गेल्या काही दिवसापूर्वी भारतात #me too मोहिमेने चांगलाच जोर पकडला होता. या मोहिमेमध्ये जास्त सहभाग हा बॉलीवूड अभिनेत्रींचा होता. त्यामुळे बॉलीवूडमधील अनेक पडद्यामागची अश्लील प्रकरण उघडकीस आली. तर अभिनेत्री तनुश्री दत्ताने ज्येष्ठ अभिनेते नाना पाटेकर यांच्यावर देखील अश्लील वर्तनाचे आरोप केले होते. तसेच ओशिवरा पोलीस ठाण्यात १० ऑक्टोबर रोजी गुन्हा दाखल केला होता. मात्र गुन्हा दाखल करताना सादर करण्यात आलेले पुरावे हे कमकुवत असल्याच समोर आले आहे.

दरम्यान अभिनेत्री तनुश्री दत्ताने काही महिन्यांपूर्वी #MeToo मोहिमेअंतर्गत नाना पाटेकर यांच्यावर लैंगिक शोषणाचा गंभीर आरोप केला होता. २००८ साली ‘हॉर्न ओके प्लीज’ या चित्रपटाच्या एका गाण्याच्या चित्रीकरणादरम्यान मोठा गदारोळ झाला होता. या गाण्यातील एका दृश्यावर तनुश्रीने आक्षेप घेतला होता. त्यानंतर तिने या चित्रपटातून माघार देखील घेतली होती. त्यानंतर ती परदेशात वास्तव्यास गेली होती. गेल्या वर्षी ती परदेशातून भारतात आली. त्यानंतर तिने #MeToo मोहिमेअंतर्गत नाना पाटेकरांविरोधात लैंगिक शोषणाचा गंभीर आरोप केला होता.