…तर आम्ही जगायचे कसे ; अंगणवाडी सेविकांचे पंकजा मुंडेंना पत्र

टीम महाराष्ट्र देशा : घराची जबाबदारी आमच्यावर असून ऐंशीच्या दशकात आम्ही अंगणवाडी सेविका म्हणून कामास सुरुवात केली. आता सरकार एका आदेशाने आमचे निवृत्तीचे वय ६० करणार असेल तर आम्ही जगायचे कसे असा सवाल करत आमची सेवा मेस्मा कायद्याअंतर्गत आणू नका, अन्यथा आम्ही आत्मदहन करू, अस पत्र अनेक अंगणवाडी सेविकांनी पंकजा मुंडेंना लिहिलंय.

भाजप सरकारची ही जुलूमशाही ब्रिटिश सरकारला लाजवेल अशी असल्याची संतप्त प्रतिक्रिया अंगणवाडी सेविकांकडून व्यक्त केली जात आहे. वेळेवर मानधन न मिळणाऱ्या अंगणवाडी सेविकांची जगण्याचीच मारामार असताना ‘मेस्मा’ जाहीर करून सरकार अंगणवाडी सेविकांनाही आत्महत्येसाठी प्रवृत्त करत असल्याचा आरोप राज्य अंगणवाडी कृती समितीचे नेते एम. ए. पाटील यांनी केला आहे.

भाजप सरकारने राज्यातील अंगणवाडी सेविकांच्या संपाचा धसका घेतला असून अंगणवाडी सेविकांनी संप करू नये यासाठी आता अंगणवाडी सेविका आणि कर्मचाऱ्यांना महाराष्ट्र अत्यावश्यक कायद्याच्या अर्थात मेस्माच्या कक्षेत आणण्याचा निर्णय सरकारने घेतला आहे.