पहिलं ‘कोरोना’बाधित दाम्पत्य ‘कोरोना’मुक्त; अजित पवारांकडून उपचार करणाऱ्या डॉक्टरांचे आभार

मुंबई : महाराष्ट्र करोनाच्या तिसर्या टप्प्याच्या उंबरठ्यावर आहे. त्यामळेच कोरोना व्हायरसचा होणारा वाढता प्रादुर्भाव रोखण्यासाठी राज्य सरकारदेखील प्रयत्न करत आहेत. तर दुसरीकडे महाराष्ट्रातील पहिले दोन कोरोनाबाधित रुग्ण म्हणून उपचार घेत असलेले पुण्यातील दोन जण बुधवारी ‘कोरोना’मुक्त होऊन घरी परतले आहेत.

याच पार्श्वभूमीवर राज्याचे उपमुख्यमंत्री अजित पवार यांनी या रुग्णांवर आणि राज्यातील विविध रुग्णालयात ‘कोरोना’बाधितांवर उपचार करणाऱ्या वैद्यकीय अधिकारी, कर्मचाऱ्यांचे आभार मानले आहे.

याबाबत त्यांनी वृत्तवाहिनीला मुलाखत दिली. ‘जीवनावश्यक वस्तूंची वाहतूक करणाऱ्यांना कोणताही त्रास होणार नाही, याची दक्षता घेण्यात येत आहे. जीवनावश्यक वस्तूंचा अवैध साठा आणि चढ्या दराने विक्री करणाऱ्यांवर गुन्हे नोंदवून कारवाई करण्यात येईल, असा इशारा अजित पवार यांनी दिला.

दरम्यान, राज्यात संचारबंदी असली तरी जीवनावश्यक वस्तूंचा पुरवठा नियमित सुरु आहे. दूध, भाजीपाला, फळे, औषधे, अन्नधान्याची कुठलीही टंचाई नाही. जीवनावश्यक वस्तूंचा पुरवठा सरकार सर्वकाळ नियमित राहिल,’ असं आवाहन त्यांनी दिलं.