बंगालमध्ये भाजप कार्यकर्त्यांच्या हत्येचं सत्र सुरुचं; आणखी एकाचा मृतदेह आढळला

कोलकाता : पश्चिम बंगालमधील बलरामपूरमध्ये आज आणखी एका भाजप कार्यकर्त्याचा संशयास्पद मृत्यू झालाय. दुलाल कुमार असं या ३२ वर्षीय तरुणाचे नाव आहे. तो आज सकाळी विजेच्या खांबाला लटकलेल्या अवस्थेत आढळा. या आठवड्यातील भाजपच्या कार्यकर्ता अशाप्रकारे लटकलेल्या अवस्थेत आढळण्याची ही दुसरी घटना आहे.

तीन दिवसांपूर्वी बलरामपूरमध्येच भाजपच्या युवा मोर्चातील एक कार्यकर्ता त्रिलोचन माहातो बलरामपूर परिसरातील सुपुर्डी गावात एका झाडाला लटकलेल्या अवस्थेत सापडला होता. त्यामुळे या दोन घटना संशयास्पद असून याची गुन्हे अन्वेषण विभागामार्फत (सीबीआय) चौकशी व्हावी, अशी मागणी भाजपकडून करण्यात आली आहे.

दुलाल कुमारचा मृतदेह शवविच्छेदनासाठी पाठवण्यात आला आहे. शवविच्छेदनाच्या अहवालनानंतरच मृत्यूचे निश्चित कारण समजू शकेल, अशी माहिती वरिष्ठ पोलीस अधिकाऱ्याने दिली. त्यानंतर भाजपचे राष्ट्रीय चिटणीस राहुल सिन्हा यांनी या प्रकरणी तृणमूल काँग्रेस पक्षाला लक्ष्य केले असून या प्रकरणांची सीबीआय चौकशी करण्यात यावी, अशी मागणी केली आहे.