fbpx

भाजपकडून उदगीर मतदारसंघासाठी २९ जणांनी मागितली उमेदवारी

devendra-fadanvis

उदगीर : भारतीय जनता पक्षाच्या वतीने शुक्रवारी लातूर येथे जिल्ह्यातील सहा विधानसभा मतदारसंघांसाठी इच्छुक उमेदवारांच्या मुलाखती घेतल्या. त्यात सर्वाधिक उदगीर राखीव मतदारसंघासाठी एकूण 29 उमेदवारांनी उमेदवारी मागितली आहे. मतदारसंघ राखीव असूनही उमेदवारी मिळवण्यासाठी सहापैकी सर्वात जास्त मागणी ही उदगीर मतदारसंघात नोंदवली गेल्याने खळबळ उडाली आहे.

गेल्या दहा वर्षांपासून उदगीर मतदारसंघावर भाजपाचे निर्विवाद वर्चस्व आहे. भाजपाचे विद्यमान आमदार सुधाकर भालेराव हे दहा वर्षांपासून मतदारसंघाचे प्रतिनिधित्व करतात. यावेळी त्यांना पक्षांतर्गत रोषाला सामोरे जावे लागत असल्याने आणि पक्षातील काही महत्त्वाच्या पदाधिकाऱ्यांनी आमदारांच्या उमेदवारीला विरोध केल्याने उमेदवार बदलणार असल्याच्या शक्यतेमुळे इच्छुक उमेदवारांची संख्या वाढल्याचे दिसून येत आहे.

शुक्रवारी लातूरच्या शासकीय विश्रामगृहावर भाजपचे बीड लातूर जिल्हा निरीक्षक तथा राज्याचे पाणीपुरवठामंत्री बबनराव लोणीकर यांनी या मुलाखती घेतल्या. यावेळी उदगीर मतदारसंघासाठी विद्यमान आमदार सुधाकर भालेराव, अश्वजित गायकवाड, डॉ. अनिल कांबळे, प्रा. पंडित सूर्यवंशी, संजय बोलकर, जिल्हा परिषदेचे समाजकल्याण सभापती बालाजी दोरवे, माजी आमदार राम गुंडीले, नामदेवराव कदम, बालाजी गवारे, नरेश सोनवणे, पप्पू गायकवाड, दिग्विजय काथवटे, शिवाजी लकवाले, गणेश गायकवाड, लक्ष्मण अदावळे, दयानंद कांबळे, बालाजी गवारे, मोहन माने, केशव कांबळे यांच्यासह 29 जणांनी उमेदवारी मिळविण्यासाठी पक्षनिरीक्षकांकडे अर्ज दाखल केला आहे.

लातूर जिल्ह्यातील लातूर शहर, लातूर ग्रामीण, अहमदपूर, औसा, निलंगा व उदगीर या सहा विधानसभा मतदारसंघांपैकी सर्वात जास्त उमेदवारीची मागणी ही उदगीर राखीव मतदारसंघासाठी करण्यात आली आहे. त्यामुळे सर्वत्र खळबळ उडाली असून, उदगीर मतदारसंघाला कमालीचे महत्त्व प्राप्त झाले आहे.

महत्वाच्या बातम्या